құрлық әскерлеріндегі бригада

(Бригада в сухопутных войсках)

әдетте, әскердің негізгі түрінің бірнеше батальонынан (дивизионынан), арнайы әскерлер мен тылдың бөлімшелерінен тұратын әскери бөлім. Бригаданың мынадай типтері белгілі: мотожаяу әскер (жаяу әскер, тауда әрекет жасайтын жаяу әскер, мотоатқыш, механикаландырылған атқыш), танк (сауытты танк), әуе-десант, танкіге қарсы, тікұшақ, теңіз-атқыш, инженерлік, инженерлік-саперлік, понтонды-көпірлі, шабуылдаушы инженерлік-саперлік, артиллериялық (келте зеңбіректі, зеңбіректі минаатарлы, зениттік-артиллериялық, танкіге қарсы жойғыш, реактивтік артиллерия) және басқалар. Механикаландырылған бригада танк полкі, 3 мотоатқыш батальоны, минаатарлы және артиллериялық дивизионы, қамтамасыз ету және тыл бөлімшелерінен тұрады. Танк бригадасы 3 танк батальонынан, моторландырылған автомат-шылар батальонынан, қамтамасыз ету бөлімшесінен тұрады. Артиллериялық бригада (келте зеңбіректі, зеңбіректі және т.б.) артиллериялық дивизион мен қамтамасыз ету бөлімшесінен құрылады. Танкіге қарсы жойғыш артиллериялық бригада қарсыластың танкілерімен күресуге арналған. Инженерлік-саперлік бригада кедергілерді жабдықтау және ұстау, қарсыластың кедергілерінің өтуін қамтамасыз ету, фортификациялық құрылыстарды жабдықтау, жолдарды дайындауға арналған. Ол бірнеше инженерлік-саперлік батальоннан, қамтамасыз ету және қызмет көрсету бөлімшелерінен тұрады.